NOVENA PERPETUA SA ATONG INAHAN SA KANUNAYNG PANABANG

 

PANGULO:

Sa ngalan sa Amahan, ug sa Anak, ug sa Espiritu Santo. Amen.

 

Mga igsoon, ania kita atubangan sa larawan sa atong Inahan sa Kanunayng Panabang aron pagdayeg ug pagpasalamat sa Dios atong Amahan tungod sa grasya nga iyang gihatag kanato pinaagi sa pangaliya ni Maria. Sa makausa pa, atong hangyoon ang atong Inahan sa pag-ampo alang kanato. 

 

Palihug Mangluhod.

 

TANAN: O Inahan sa Kanunayng Panabang, tan-awa kami imong mga anak. Among himaya nga kami imong mga anak,* ug kalipay namo ang pagtawag kanimo nga among Inahan. Apan daghan pa kaayo kami ug kulang *busa midangop kami kanimo, among Inahan. Andam ikaw kanunay sa pagdawat bisan unsay among kahimtang karon * aron pagdasig kanamo sa pagdugang pagpaningkamot sa pagka-maayo *bisan pa sa tanang mga pag-tental ug sa among kahuyang.

 

Sa among pagtan-aw sa imong larawan nahinumdom kami sa imong kinabuhi dinhi sa kalibutan. Nahiagum ka sa daghang mga krus ug mga pagsulay apan naantigo ka sa pagsagubang kanila May pagtoo ka ug pagsalig sa Dios. Nagsalig ka sa iyang mahigugmaon ug amahanon nga kaayo. Tabangi kami sa pagsunod kanimo. Nahiagom usab kami sa mga pagsulay ug kagul-anan. Sa makadaghan naguol kami ug nalibog. Taga-i kami sa kaisog. Lig-ona ang among pagtoo. Tabangi kami sa pagpadayon sa dugang pagpaningkamot sa higayon nga kawad-an kami sa paglaum. Sa imong pagbarog sa tiilan sa krus nalibog ug naglisud ka sa pagsabot ngano nga mitugot man ang Dios nga ang iyang Anak * nag-antus sa ingon nga kasakit. Apan bisan pa niana, wala gayod ikaw kawad-i sa pagtoo. Tabangi kami nga makakat-on gikan sa imong panig-ingnan sa pagharong sa mga pagsulay uban sa paglaum ug pagsalig sa Dios. Usahay, mahigugmaong Inahan, hilabihan ang among kaguol tungod sa among mga suliran mao nga nahikalimot na lamang kami sa Dios ug sa mga kinahanglanon sa uban. Buot kami nga mahisama kanimo. Nahikalimot ka sa imong kaugalingon ug sa imong mga suliran diha sa pagkakita nimo sa uban nga nagkinahanglan. Tabangi kami sa paghinumdom * nga ang mga kaguol ug kasakit sa uban usahay mas dagko pa kay sa amoa. Busa, Maria among Inahan, bisan naga-ampo kami kanimo alang sa mga lain-lain namong mga tuyo among giapil silang tanan nga imong mga anak nga nagkinahanglan *ang mga masakiton ug himalatyon, ang mga gimingaw ug naguol,* ang mga kabus ug mga linupigan; sa usa ka pulong, ang tanan nga nagkinahanglan sa imong kanunayng panabang. Amen.

KATILINGBANONG PAG-AMPO

 

Pangulo: Inahan namo sa Kanunayng Panabang, kaming imong mga anak, nagsangpit kanimo…

 

Tubag:  Inahan, tabangi kami kanunay.

 

+ Aron sa kanunay imo kaming lamdagan…

 

+ Aron madasig kami sa panahon sa among mga kalisdanan… 

 

+ Aron makita namo unsay gipasabot sa mga kalipay ug mga kasakit sa kinabuhi…

 

+ Aron ang among pagsalig sa Dios makadasig usab sa uban… 

 

+ Sa panahon nga maglisud kami paghukom unsay among buhaton…

 

+ Kon pangayoan kami’g sakripisyo alang sa kaayohan sa uban…

 

+ Kon may makapahiubos kanamo ug matental kami sa pagpanimalos…

 

+ Sa panahon nga dunay masakit sa among banay… 

 

+ Sa among kaguol tungod sa kawad-on…

 

+ Kon saypon kami pagsabot sa mga tawo nga among gihigugma… 

 

+Sa pagtabang namo sa mga batan-on aron mosalig sa ilang kaugalingon ug aron mahimo silang mga tawo nga responsable…

 

+ Sa panahon sa pagpatalinghog kon ang Dios magtawag kanamo sa pagkapari o pagka-relihiyoso, labi na sa pagka-Redentorista…

 

+ Sa among pagpili sa mga lingawlingaw ug lolinghayaw… 

 

+ Aron sa among pagka-ginikanan makakat-on kami sa pagsabot sa among mga nagtubo nga mga anak… 

 

+ Aron ang mga magtutudlo madasig kanunay diha sa pag-giya sa ilang mga tinun-an..

 

+ Aron ang mga tinun-an magpakita ug pagmahal kanila nga nagsakripisyo alang sa ilang edukasyon… 

 

+Aron dili kami modangop sa mga drugs o ilimnon alang sa paglingkawas sa mga suliran sa kinabuhi…

 

+ Aron sa among pagpaningkamut sa pagpanginabuhi gamiton namo kanunay ang matarong nga paagi….

 

+Aron dili kami maulipon sa kahakog alang sa gahum, bahandi ug dungog…

 

+Aron among ikapasigarbo kanunay ang maayong pagtuman sa among trabaho…

 

+ Aron ang mamumuo tagaan sa husto nga suhol tungod sa husto nga buhat… 

 

+ Aron dili kami, pinaagi sa pagtabang kunohay sa uban, o pinaagi sa mga ahensiya sa pahulam, makadaot kanila pinaagi sa dili makiangayong interes o tubo…

 

+Aron dili kami magbabag sa katarong pinaagi sa suborno o panumpa sa bakak.. 

 

+ Aron dili lamang ang among kaugalingong kaayohan ang among hunahunaon diha sa among pag-alagad sa katilingban (o pagbotar)…

 

+ Aron hunahunaon namo kanunay ang katahum sa among yutang natawhan ug ang kaayo sa among lungsod…..

 

+ Aron buhaton namo kutob sa mahimo ang pagpatunhay sa hustisya ug kalinaw dinhi sa among nasod…

 

+ Aron dili kami magpalabi’g kamapahitas-on hangtod sa paghuna-huna nga makahimo na kami bisan walay Dios ni relihiyon.. 

 

+ Kon ang among mga minahal tawgon na ngadto sa puluy-anan sa langitnong Amahan… 

 

+ Sa among pag-ampo nga ang among mga minahal nga nangamatay  makaambit unta sa hingpit nga kalipay sa pagkabanhaw ni Kristo… 

 

+ Alang sa nagkalain-laing mga tuyo labi na kadtong gipadala karong semanaha….

 

Tanan:  Santa Maria, nagatabang ka kanunay sa tanan nga nanginahanglan, naglipay ka sa mga naguol, *nagdasig ka sa nawad-an sa paglaum, ug nagtabang kanila aron magpuyo’g maayong kinabuhi nga kristohanon. Ubani kami sa among pagpangayo sa Amahan aron tultulan ug agakan kami niya.

 

PAG-AMPO SA PASALAMAT:  (Manindog ang tanan)

 

Pangulo: Ato karong pasalamatan ang atong Inahan sa Kanunayng Panabang sa mga kaayohan nga atong nadawat pinaagi sa iyang pangaliya. Uban kaniya atong pasalamatan ang Dios nga tuburan sa tanang grasya.

 

Tanan: O Inahan sa Kanunayng Panabang kuyog kami kanimo uban sa mapasalamaton nga mga kasingkasing * aron pagpasalamat sa Dios tungod sa tanang mga kaayohan nga iyang gibuhat alang kanamo.

 

O Dios among Magbubuhat, nagapasalamat kami kanimo tungod sa kinabuhi ug tungod sa mga gasa sa kinaiya *ang among mga balatian ug mga galamhan* ang among mga kahibalo ug kaantigohan. Nagapasalamat kami kanimo tungod sa imong pagbuhat kanamo sa imong larawan ug kasamahan*, ug tungod sa imong paghatag kanamo niining kalibutan* aron among gamiton ug ugmaron*, aron among panalipdan ug atimanon. Bisan pa sa among mga kapakyasan *nagapadayon ka sa pagpakita sa imong gugma kanamo karong adlawa pinaagi sa pagpalambo sa kinabuhi sa imong Espirtu dinhi kanamo.

 

Sa katapusan*, nagapasalamat kami kanimo mahigugmaong Amahan* tungod sa paghatag nimo kanamo kang Maria* Inahan sa imong Anak, nga maamong Inahan sa Kanunayng Panabang. Mapasalamaton kami* tungod sa tanang mga kaayohan nga among nadawat pinaagi sa iyang pangaliya. Naga-ampo kami nga kadtong nangagi nga mga hatag* magdasig kanamo sa pagdugang sa among pagsalig sa imong mahigugmaong kalooy* ug sa pagpangayo sa hinabang sa among Inahan sa Kanunayng Panabang. Amen. 

PANGULO: O Dios, mahigugmaong Amahan, *nagtigum kami karon isip imong katawhan, *nga gibunyagan ngadto sa usa ka lawas ni Kristo. Ania kami aron pagsaulog *sa imong pulong ug sakramento. Tabangi kami *pagpamati pag-ayo sa imong pulong *ug pagtuman niini diha sa among paglihok *alang sa pagtukod sa Kristohanong Katilingban. Tabangi kami pagsaulog pag-ayo *sa sakramento sa Eukaristiya, aron sa maong paagi *labi pang mapalawom *ang amon pag-ambit *sa Misteryo Paskal sa among Ginoo. 

 

(Samtang awiton ang mosulod nga awit mosulod na ang pari)

 

Awit: Maghimaya ka Maria 

 

Tanan: Maghimaya ka Maria puno ka sa grasya, ang Ginoo anaa kanimo. Bulahan ikaw sa mga babayeng tanan ug bulahan ang bunga sa tiyan mo nga si Jesus. Santa Maria Inahan sa Dios, iampo kami nga makasasala karon ug sa oras sa among kamatayon. Amen. 

ANG MISA NGA PAHINUNGOD SA INAHAN SA KANUNAYNG PANABANG 

Pari: Sa ngalan sa Amahan, ug sa Anak ug sa Espiritu Santo. Amen 

 

Pari: Ang grasya sa atong Ginoong Jesukristo, ang gugma sa Dios ug ang panaghiusa sa Espiritu Santo maana kaninyo. 

 

Tanan: Maanaa usab kanimo. 

 

Pari: Mga kaigsoonan, atong gipahinungod kining Misa alang sa atong Inahan sa Kanunayng Panabang. Sanglit dili man kita mga tawo nga walay sala sama ni Maria, mangayo una kita ug pasaylo sa atong mga sala. 

 

Pari: Kay wala man kami magbalos sa imong gugma kanamo, Ginoo kaloy-i kami. 

 

Tanan: Ginoo, kaloy-i kami. 

 

Pari: Tungod sa among kahadlok ug kabalaka, wala kami mo barog sa among mga katungod, Kristo Kaloy-i kami. 

 

Tanan: Kristo, kaloy-I kami. 

 

Pari: Tungod kay ang amo lamang kaugalingon ang among gihugugma ug nahikalimot kami sa gikinahanglan sa uban, Ginoo, kaloy-i kami. 

 

Tanan: Ginoo, kaloy-i kami. 

 

Pari: Kaloy-an unta kita sa Dios nnga makagagahum sa tanan, pasayloon kita sa atong mga sala ug dad-on kita Niya ngadto sa kinabuhing dayon. Amen. 

 

Pari: Mag-ampo Kita: 

Amahan, ang mga pag-ampo sa Mahal nga Birhen Maria – ang among Inahan sa Kanunayng Panabang, makatabang unta kanamo, kay pinasagdan sa among kahuyang dili gayud kami makatuman sa imong kabubut-on. Kini among gipangayo pinaagi ni Kristo among Ginoo. 

PAG-AMPO SA PAGHALAD

 

Pari: Dawata, Ginoo, ang mga pag-ampo ug mga gasa nga among gihalad niining adlawa sa among pagpasidungog kang Maria, ang Inahan sa Kanunayng Panabang. Makapahimuot unta sila kanimo ug makadangat sa Imong pasaylo ug kinahanglan alang kanamo. Kini among gipangayo sa ngalan ni Kristo among Ginoo. 

 

PAG-AMPO HUMAN SA PANGALAWAT

 

Pari: Mag-ampo Kita: 

Ginoo, malipayon kaming nagasaulog sa imong Sakramento ug nagapangayo sa imong kalooy samtang kami nagpasidungog sa Birhen Maria, ang among Inahan sa Kanunayng Panabang. Ang iya untang pagtoo ug paghigugma makapadasig kanamo sap ag-alagad kanimo sa pagpadayon sa imong maluwasnong buhat. Kini among gipangayo ni Kristo among Ginoo. 

KATAPUSANG PANALANGIN

 

Pari: Iduko ang inyong mga ulo alang sa panalangin. 

 

Pari: Ang atong Ginoong Dios maana-a unta kaninyo aron pagpanalipod kaninyo. 

 

Tanan: Amen 

 

Pari: Maana-a sulod ninyo aron pag-amping kaninyo. 

 

Tanan: Amen 

 

Pari: Sa atubangan  ninyo aron pagtultol kaninyo 

 

Tanan: Amen 

 

Pari: Sa luyo Ninyo aron pagbantay kaninyo. 

 

Tanan: Amen 

 

Pari: Ug sa ibabaw ninyo aron pagpanalangin kaninyo. 

 

Tanan: Amen 

 

Pari: Ang Amahan, Anak ug Espiritu Santo. 

 

Tanan: Amen 

 

Pari: Lakat kamo sa kalinaw aron paghigugma ug pag-alagad sa Ginoo. 

Tanan: Salamat sa Dios.